En busca da cagalla do lagarto

novembro 04, 2015

Julio Tizón Diz, pintor

O pintor e amigo José Corral Díaz (Clarés de Ribota - Zaragoza, 1918 - Ourense, 2004) introduciume na arte do seu colega de profesión Julio Tizón Diz (San Cristovo de Cea - Ourense, 1917 - Ourense, 1999). Entón, do segundo soamente coñecía o debuxo do Moisés, de Miguel Ángel, realizado ao carboncillo e carbón composto, obra colgada na Escola de Artes e Oficios da Deputación de Ourense, lugar no que se organizou unha exposición do curso 1987 -1989 en homenaxe a Tizón, quen preparaba o retorno desde Estremadura a terras ourensás. En febreiro de 1989, con motivo dunha mostra dunha vintena dos seus cadros no Ateneo ourensán, entrevistei o pintor que debido á súa xordeira de nacemento contestoume por escrito ás miñas preguntas.

Daquela entrevista quedei coas seguintes palabras sobre as súas motivacións á hora de debuxar ou pintar: "Todo o que ten sentido, o que acariña a alma, pasa polo meu corazón e acelérame as mans. Nese instante nace a miña obra. A vea artística desenvólvese tan só camiñando cada día dentro dun mesmo".

A arte sempre é mellor observala, escoitala, mesmo palpala, por iso non me estendo en divagaciones sobre a biografía e o legado plástico de Julio Tizón.

Da súa obra plástica recupero unha pequena antoloxía que de seguro agradeceran os que teñen a capacidade de admirar a beleza.