CEO EN CINZAS

Berro de lume

Lama no corazón: Que adolescencia!

Que impaciencia de luz enarborada

no cadaval da vida, que xelada

e tebregosa noite de inclemencia!

Que loito amañecido! Que impotencia

en urros de dolor, que desolada

fronte sen litoral! Que alta xiada

no corazón da noite!

Que indixencia!

O teu mundo é vermello: ceo en cinzas,

orfandade no mar, umbela fría

crecida nas areas do desterro.

Espido corazón: por que te encinzas?

Erguete en labaradas de ardentía.

Abrásate no lume do teu berro!

Eduardo González Ananín