Entroido peliqueiro
Entroido peliqueiro
que vas coa túa pelica
batica que batica,
zoupando no bulleiro.
Entroido, alegre lume
na coresma da vida,
que sánda-la ferida
e cúra-lo queixume.
Disfrázame de Entroido
as penas que hoxe sinto,
faime un home distinto
e dáme o teu descoido.
Orinol de chapeu,
pelica por sotaina,
así en ritual andaina
de furcia e gran baldreu.
Larpeiro e nugallán,
boneco de estropallo
tanguendo o teu chocallo
de leigo sacristán.
Borracho e esmorguista
cantando niste enterro
o teu valente berro
burlón e cupletista.
Dáme desa alegría
sequera unha migalla,
con astro de borralla
píntame a cara fría.
Entroido, chuchumeco,
meu santo de feluxe,
leda cinsa en que foxe
meu perfil de careco.
Berros en voz baixa
Antón Tovar
Fotografía de Sam Rock
Comentarios