Porque a terra é redonda
Cunha man colléu a mar
e coa outra un veleiro,
pra explicar unha das probas
de que a Terra é redonda.
- ¿Todos os días?, preguntáballe eu.
¿O mesmo polo día que pola noite?
- Sempre, respondeume, e si redonda non fora
en toda a súa coda non se tería nada en pé,
a mar subiría deica a neve dos altos montes,
non poderían voar as aves
nin correr os nenos polos campos do verán.
Nin siquer habería verán.
Todo o que é, a rosa e máila lua,
a alma miña, os ventos, a sorrisa dela
e a sombra da cerdeira, e as cereixas,
tal son porque é redonda a Terra.
Ó veleiro mergullábase no horizonte
e a mar iba e viña na súa man dereita
a escuma das ondas escorrendo entre os seus dedos.
Refrescaban o meu rostro redondas pingas de choiva
caída de grandes nubens que viñan do sul
gracias a que a Terra é redonda.
Herba aquí ou acolá
Álvaro Cunqueiro
Fotografía de Roque Soto
Comentarios