A escola
A miña nai foi a miña escola.
Os días de chuvia, os bancos de madeira,
os mapas de todos os lugares do mundo,
o cartabón e a escuadra, as figuras
xeométricas, a brúxula,
os globos terráqueos, os compases,
resumen na lembranza
tanto tempo de tinta e de tiza.
A infancia fóiseme
polos ocos dos tinteiros
no alto dos pupitres.
(De tanto escoitalos no colexio
soupen os libros de memoria
antes de aprender a ler).
Na escola maternal
pequena e soa
aprendín o que sei
sempre a deshora.
Claudio Rodríguez Fer
Debuxos de © Celedonio Perellón
Comentarios