OPOÑENDO MEDIOS CORPOS
Fillas do centauroda miña voz cóntame o uso
Metamorfosis, II, 656
tiñades vermella a cabeleira
como a filla do centauro
dobre o corpo, dobre a vida
vermellando desde as raíces do cabelo
voces
pensamento
palabras
clandestina, a metade égua
galopando á madrugada na porta das fábricas
a lobos das verbas impronunciábeis
opoñendo medios corpos
a cabalos enteiros
cruzando sobre o gume dun soño
a longa noite de pedra
tiñamos vermella a cabeleira
de Quirón aprenderamos artes non escritas
mais Sibila cuspiu na nosa boca
o descontento cun destino selado
e pronunciamos nomes do futuro
con voces nunca suplicantes
posuídas polo delirio vaticinador
percorriamos veloces
a crista dos tombos
e as espigas de centeo
non se dobraban baixo os nosos pés
como á filla do centauro
anunciando os arcanos do futuro
quixeron amputarnos a voz
Marilar aleixandre
Comentarios