A dúas adolescentes molladas polas choivas de primavera


Saúde neses corpos que levan a frescura
destas sombras chiviosas polo ceo de maio.
A primavera chove en doce augas claras.
Nubes de corazón brillante.

Na brancura das frontes de silencioso vento
tedes a vosa luz e estrelas húmidas
arden nos vosos ollos con íntima alegría.
E sorrides ao tempo nas rosadas meixelas
ofrecéndolle ao mundo un aceno limpísimo
de primeiros amores.

Saúde neses corpos de cabelos mollados
por esta lenta choiva entre o voso perfume 
de poros desexados para bebelos todos.
Baixo os vestidos mornos sodes ondinas ledas
que soña este silencio de lagoa despida.
Na vosa pel levades licor de flores nidias,
azucre namorado nos vosos labios finos.
Qué saborosos froitos se inflamarán un día
nos vosos corpos novos de cervas exquisitas.
A redondeza suave dos peitos temesiños
ten marabilla e gozo de cálice anceiado
e que tenro veludo se adiviña en luzada
nas vosas coxas doces de brancura pulida.

Saúde fonda e longa a eses húmidos corpos
de choiva e primavera,
corpos novos e alegres,
fermosuras tan vivas,
adolescentes corpos para deusas futuras...

sodes puras presenzas dun eterno desexo.



Do desexo en corpo e sombra
Miguel Anxo Fernán Vello

Fotografía de © BCCL

Comentarios

Publicacións populares