SOL POR ENTRE AS GALLAS

Protéxeme, crepúsculo

Protéxeme, crepúsculo,

lugar dos meus exvotos,

humilde acudo ao sol en rogativa.

Ás voltas coas andadas,

buscar na infancia

o tesouro do mapa oculto baixo as pedras.

En min sempre levita Lola ingrávida,

cun acompañamento sonoro de pardais,

seu perfil en realce pola extrema.

Sibila en Ribadavia, chambra moura,

Bendita sexa a que esmagaba os acios

para facer o viño como se fose a luz,

¡canto amor aínda move!

Nesta hora, amparada a poñente,

peregrino ata o mundo amatista das viñas:

é que nada se entenderá de todo

se antes non regreso ao punto de partida.

Non me permite a morte

alcanzar o recamo por onde Lola asoma

como un doce debuxo de Chagall.

Elexía a Lola

Xohana Torres


Obras de Sanford Robinson Gifford, Laxeiro e Marc Chagall