OS TEUS OLLOS

Os teus ollos

Ten a serena o canto

i a serpe o alento;

o lago ten a onda,

Dios ten o inferno.

Ti tes de abondo

co que tes escondido

neses teus ollos.

O trono dos monarcas,

do sabio os trunfos,

a groria do poeta,

o ouro do mundo:

Dera eso todo

por sólo unha mirada

deses teus ollos.

Buscan os pitorreises

pra faguer niño,

a herba santa que nace

veira dos ríos.

Eu busco sólo

unha mirada meiga

deses teus ollos.

Cando se pon a lúa

tras dos penedos,

choran as estreliñas

todas do ceo.

Tamén eu choro

cando non me alumean

eses teus ollos.

Manuel Curros Enríquez

Fotograma do filme: La fille aux yeux d'or, dirixida por Jean-Gabriel Albicoco
Fotografía de Flickr
Partitura de José Castro Suárez "Chané". Biblioteca Nacional de España