REGUEIFA NOS MUÍÑOS

 

Segador

Pillou a lúa ao lombo...Nin paxaros nin niños:

o fume da poeira nos chairos de Castela.

Sen chancas nin espigas —o pan, o pao son dela—

E volta pra Galiza co vento dos camiños.

Dez pesos nunha nota! Regueifa nos muíños,

enchenta de saudades e caldo pra a cadela.

O sol estraño e fero! Bola de pan, manela,

apertas da parenta e bicos dos meniños.

Hala! Hala pra Galiza, que hai brétemas e orballos

e gándaras e serras e relva e cascallos.

Castela regateira merca suor e calos.

Hala! Hala pra Galiza, que hai flores nos carreiros

e festa nos regatos e prata nos outeiros.

Por sangue novo e rexo castela dá diñeiros.

Fírgoas
Manuel Luís Acuña

Fotografías: A seitura en Pixeiros (Ourense). © Manuel Mandianes Castro.