ARPÓN DE BÁGOAS FIRENTES

O pescador de baleas brancas

Se eu fora mariñeiro de Corme ou de Caión

ninguén me poñería o pé de diante, non.

Tiña de ser pescador de brancas baleas

e de corazóns mouros.

Cando marease de cara a Islandia,

levaría arpón de bágoas firentes

e de salaios que partían

cordas de versos tristes

e raba de sinos doídos.

E, daquela, as baleas brancas, pombas do mar,

arredor da miña torre de almasí, meu campanario

de outos doores,

pregarían inquedas por ser nocidas

polas miñas artes sensitivas,

e levadas a remolque das angurias

pra os mares febrescentes,

onde amarrara os meus adivales de canzóns…

Que non somentes eu arregálome co amarguexo,

nin os homes tan só arregostan das penas!

E, en chegando ao bon porto co albo cargamento,

Terían de berrar as mozas, onde mudas e mortas,

E os afogados todos do meu bairro:

-“Vinde ver, que volve rico de mourenzas,

quen apoñou alburas o noso amigo,

con nós coroado de medos e néboas

no longo cabadelo”.

E chegarían, daquela, os espantos todos,

feitos e rechamantes,

recachadas as vestes e ceibes os sospiros,

nos perdidos salseiros

da súa vida derramada.

E faría con eles unha Santa Compaña

de fachas alcesas xo óleo das baleas

ledas de se queimar nos meus anceios,

e por sempre vagando, areeiros adiante.

Se eu fose mariñeiro de Corme ou de Caión,

ninguén me poñería o pé de diante, non!...

Seitura
Fermín Bouza-Brey

Fotograma de In the Heart of the Sea (2015), dirixida por Ron Howard.