FULXIR DE FOGO QUE ALAPEA

Illa

Estreitarei a túa cinta leve
con medo de perder cousas de vidro
Valeiradas estancias de crepúsculo
infernan vermellóns rubíns de escuma

e toda estrelecente rubra prata

convócame a encarnada cuncha lisa

Esta illa de pedra sobre a lámina

do mar de Lapamán en quedo intre

detén o cor cesura de infinito

ou estantía suspensión de trásitos

Buguinas incendiadas de silenzo

prorrompen en estrépito calado

A onda no reventa que está inmóvil

detida no proceso de apreixarte

Moimento de si mesmo o sol deténse

e o seu fulxir de fogo que alapea

fíxase en brasa ou moeda estática

Ficou queda a gavota a dorna absorta

Naufragou no meu verso tanto instante

Porque hei de rachar este ar de mármores

cinguirei o teu van e nun asombro

de carnes todo voltará a ser móvil.

Xosé Luís Méndez Ferrín

Fotografía de © Tamara Lichtenstein