CANDO O VERÁN PERCURA UNHA CERTEZA

Escuro designio

Un río unha conciencia

un lugar imprevisto

onde pasan os intres as verbas iniciais figuras transitorias,

ondas deshabitadas.

Unha casa de pedra acordada na chuvia,

un hálito de lilas...

Aquí nacín

cando o verán percura unha certeza

no ritmo dos espacios.

Estou escrita nesta luz pensada

nesta limpa memoria

nesta liñá sen sombra que decide a existencia.

(Mesmo un mar cercado a identidade miña).

Aquí nacín

Presenciei un destino de sucesivos prantos

de razóns moduladas

unha noite habitada por escuros designios

na historia dunha terra...

Como un presentimento de verbas desterradas

soupen que volvería.

Había lindes rigorosas penumbra lousas cifras

curvas esnaquizadas.

Un bosque consagrado. Unha fonte sin patria.

Atopei o camiño

onde a mañá concentra o primeiro vestixio

as madeiras unánimes

as pegadas espidas na lisura do tempo

para vagar en calma.

Códice Calixtino
Luz Pozo Garza
Fotografías de © Sam Rock