Máis alá de Lugo
Desde que soupen ler, compuxen
enciclopedias, escribín poemas,
viaxei polos mapas de Quebec
a Lituania, recitei a Homero,
contemplei os fastos babilónicos
e os tigres de Bengala, fixen
álbumes e herbarios, deseñei
fabulosas construcións de madeira,
participei na revolución rusa
e imaxinei películas e libros.
Tanto vivín de neno
que cheguei a crer que de maior
todo me ía a parecer xa visto.
Pero aos dazasete anos
apareciches ti.
E volvín ler libros xa lidos,
a escribir os versos nos que habito,
a viaxar por Utopías libertarias
e a recitar a Ossián, contemplando
laberintos cabeleiras como un tigre
de ternura, construíndo un liquen de amor
en cada leito, recompoñendo a mesma
historia da lúa que iluminou a revolta
e fixen películas e libros.
Pero nada foi como vivir contigo
tantos poemas de amor sen morte
en Lugo e máis alá de Lugo.
Claudio Rodríguez Fer
Gravados de Manuel Castro Gil
Comentarios