SOL POR ENTRE AS GALLAS

Capas

Ti, Galiza (Ariola). O lugués do Valadouro, Miro Casabella, cunha década de traballo musical, incluída a súa presenza no movemento Voces Ceibes, gravaba en outubro de 1976 o seu primeiro elepé en solitario dedicado á súa terra e paisanos. As cancións do disco con arranxos e dirección musical de José María Branco e Luis Pedro Faro, inclúe así mesmo instrumentación popular, gaitas e zanfona, que realza a galeguidade deste traballo, onde a música se apoia en textos de coñecidos autores galegos. Xosé Manuel Casado, Ramón Cabanillas, Celso Emilio Ferreiro, Luís Pimentel, Uxío Novoneyra e Xavier Costa, cando non é o autor quen presenta un texto propio ou a adaptación dalgunha estrofa popular. As letras das cancións dos citados escritores de diferentes xeracións representan unha tendencia social moi na liña do traballo de Miro Casabella, implicado a mediados dos setenta, como xa fixera con anterioridade, na busca da normalización da lingua e cultura galegas. Esta tendencia resalta sobre todo en cancións recitadas como a que dá título ao elepé o “Comenzo de canto”, nas que se evidencia a reivindicación nacionalista. A cuberta do disco representa o gravado Son moitos anos de estar no potro… compañeiros, de Enrique Ortiz Alonso.

Cancións: “O meu país”, “A maleta”, “A gran muralla”, “María Soliña”, “Anacos”, “Ti, Galiza”, “Canzón para que un neno non durma”, “Goethe”, “O mariscal”, “Comenzo de canto” e “A bandeira”.

Músicos: Miro Casabella (zanfona e voz), Luis Pedro Faro (frautas do renacimento, caixa e percusión), Xosé Casal (gaita), Miguel López (gaita), José María Branco (órgano Hammond e zanfona) e  Anxeles Rubial (voz).

Outras capas: Treboada (1979) e Orvallo (2004).