CARA A UN VOLCÁN

Evasión ou vitoria

Xa toda a terra é un cárcere,

así que

desta vez 

imos facer un gran túnel

que una todos os demais

cara a un volcán.

Levamos tempo de máis 

construíndo labirintos.

Agora,

as toupas,

comezaremos a furar as entrañas das profundidades

ata que saia a lava.

Cambiarémoslle a cara

ao antes chamado planeta azul,

que despois será quente, vermello e negro.

Xusto o que nós vemos

 entre o que non vemos.

Estamos de camiño.

Cando cheguemos

poderedes deixar de preocuparvos

polo futuro,

pola apocalipse.

Por fin,

Fin.

Nunca mascotas

Paula Carballeira