BRILLA A DISTANCIA

Vía Láctea

A Alicia Castro e Carlos Díaz Martínez

País de luz nevada e vendimia de estrelas!,

nos labios da cantiga a  brancura do tempo 

teceu lentos outonos e solpores de néboa.

Nas arxilas da noite levedou un milagre

e un mar iluminado abriu todos os ollos

como un fervor de praias no devalar do vento.

Camiño branco e pedra, signo de alba e escuma,

arborecidos meses de silencio e soño

acenden flores novas no ronselar da altura.

Un sopro de ar fecundo nace na pel dos astros:

queimadura e camelia, brancor de sangue súbito,

claridade e navío, exaltación de espello.

O tempo onde cintila a sede e ferve o frío

constelado de seivas, delicado volume

no corazón da auga, na fonte estrelecida.

Paisaxe de frescura, camiño de alta noite,

cicatriz e piedade do inverno transmigrado

na música tremente das abóvedas núas.

Arde o ceo é a semente, raíz dentro da luz,

arde o río somnánbulo, árbore transparente

que acende o ar: o centro invisíbel do mundo.

Brilla a distancia, o lume, a vertixe das pombas

no corazón da noite, todo un fulgor de viñas

brancas como a memoria, inmensa cifra pura.

Un manantío aceso, acio vivo de orballos.

urdime poderosa onde vibra a alta choiva,

lentísima espesura de lagoa estrelada.

A onde leva o camiño, a que país soñado.

Por bosques e por chairas ramos de lonxanía

e unha febre de néboas e florecer na brisa.

Oh corazón alzado entre poeira e seda,

sabes que no horizonte respira o mar e o ceo

e a noite máis antiga é unha espiral de vida.

Agora, xa no abismo, fronte o mar que é destino,

entre sal e azucenas, entre mercurio e gloria,

esa ferida branca na saúde da sombra.

Alba de branco corpo, luz crecente do tempo,

compostela diurna como unha praia, un labio

de cantiga no vento, perfil de eternidade.

O camiño é un silencio na alma como un vidro,

delicada substancia de séculos e olvido

fronte á morte que foxe desta luz entrañada,

deste mar, desta terra, deste regreso á vida.

Poemas de lenta nudez (1994)

Miguel Anxo Fernán Vello

Fotografías: Nicholas Roemmett (1), Yuri Zvezcny (2) e Rick Whitacre (3).